تحت موس الأيام .. محيبس إبراهيم عرب....أيمان البستاني
تحت موس الأيام .. محيبس إبراهيم عرب!!
الحلقة الرابعة والعشرون
سيد شاكر : صبحّك الله بالخير سيد رجب ...علاوي أجاني الصبح وشال ثلاث شيش دعابل ..وكال أخذ فلوسها من عمي
سيد رجب : شعنده هالملعون ..يريد يفتح دكان ..بسيطة فلوسها ..وينك يمعود البارحة ...أشو ورا الفطور مامريت على الگهوة؟؟
سيد شاكر : والله سيد رجب أشو منا فطرت ..ومنا تعاجزت أطلع ..تمددت بالحوش وأختك أم ياسين حطت قوري چاي يم راسي وهية تمديدة ..وهية كرّع چايات ..وللسحور...خير شصار بالگهوة وراية البارحة؟؟
سيد رجب : أي أجى ابراهيم عرب ولعبوا محيبس بالگهوة
سيد شاكر : بدينك ..لا يا أبو محمد ...لو دازلي علاوي ..ومنو خسر صينية البقلاوة
سيد رجب : معليك منو خسر ...دگول شسوا ابراهيم عرب ..والله أبو رحومي موتنا ضحك بسوالفه
سيد شاكر : أگول الگهوة بعدها مخربطة من گعدة البارحة ...لعد عالگيها وراية ها ...الف عافية
سيد رجب : والله الرجال چان مار صدفة .. وتحايلت عليه يگعد ..وبدا يحگي على رمضان گبل
سيد شاكر : هو رمضان هسة ...مثل رمضان گبل ..يرحم أبوك
سيد رجب : لا يابة لا ..رمضان گبل شكل وهسة شكل ..الناس چانت طيبة ...والقلوب چبيرة ...والدنيا غير دنيا ...والبشر غير بشر
سيد شاكر : أي مولاي لاعاب حَلكّك
سيد رجب : أي مثل ماگلتلك ......لعبو محيبس ..وراها گام أبو رحومي ابراهيم عرب يتشاقى ويحچي الأهل الگهوة شلون جان يلعبون محيبس گبل
سيد شاكر : هو المحيبس..محيبس...شخلاللها أبو رحومي فيكات وجذب
سيد رجب : يگول گبل الگمر برمضان يطلع بدر 30 يوم
سيد شاكر : هاي شلون چذبة من أبو رحومي ..وشحده اللي يگولة لاع
سيد رجب : لا منو يگدر يگولة جاي تجذب ...وهو قصده الدنيا گبل منورة أكثر
سيد شاكر : أي معقولة ...وبعدين أبو محمد؟؟
سيد رجب : ويگول چان يلعبون محيبس ورا صلاة التراويح ..هو وجماعته يگعدون على الشط صوب الأعظمية ....ويگعد أسطة عبدالله الخياط وجماعته گباله صوب الكاظمية
سيد شاكر : وشلون يلعبون ؟؟... إذا كل جماعة بصوب
سيد رجب : جماعة أبو نجم - أسطة عبدالله الخياط - اثنين يلزمون البطانية ويبيتون المحبس ....ويصعد ابراهيم عرب على صخرة عالية صوب المعظم يباوع عليهم
سيد شاكر : شنو زرقاء اليمامة؟؟ .. نعللا على إبليسك أبو رحومي
سيد رجب : يگول يباوع عليهم ..ويصيح ..أفرز ..أگعد انت أبو الصاية ...أطلگ أبو العرقجين ....أگعد انت أبو أليشماغ ...أبو ألزبون جيبه من اليسرى ...وتشتغل الهلاهل والتصفيك
سيد شاكر : زين شلون يجيب المحبس أبو رحومي من ذاك الصوب
سيد رجب : أي وداعتك سألناه نفس السؤال ..يگول البلم موجود و آخذ فانوس لوكس و ياية وأعبر الذاك الصوب وأجيبه
سيد شاكر : أبومحمد الفانوس شيسوي بيه، الدنيه گمرة وضويه انته موگلت الگمر يطلع 30 يوم بدر وميغيب
سيد رجب : يمعود دعبرهه للسالفة مومشت و محد فكدهه ...ولك علاوي وين جنت ؟؟...عايف كويظم وحده ايد على الجايات ..وايد يصفط كراسي الگهوة
علاوي : جنا نلعب دعبل آني وذاك الصوب!!
سيد رجب : هاي البارحة سمع سالفة محيبس ابراهيم عرب ..شراح يخلصنا اليوم ...لازم يسويله مكسورة!!
سيد شاكر : أدري وليدي محيبس وذاك الصوب بلعناها ..بس شلون تلعب دعبل ...وين تنّكر الدعابل؟؟؟
علاوي : عمي وداعتك كلها بالشط
سيد رجب : بروح أبوك سيد شاكر ...هذا علاوي مو مستحق ملص أذان ...ولك ملعون ثلاث شيش دعبل بالشط ..وبالدين ..لو دافع فلوسهن هماتين ميخالف ..ناوشوني العصاية دأضرب روحي مو خبلني هالمصيول